viernes, 31 de diciembre de 2010

Mensaje de Nochevieja de S.M. el Rey Aurelius II

Queríos conciudadanos, nesta entrañable Nuechevieya, tengo l'atrevencia d'entrar col vuesu permisu nos vuesos llares, pa espresavos el mio ciñu y les mios mayores felicitaciones a tolos asturianos, a los que moren nel nuesu país y a aquellos que les vicisitúes de la vida llevar más allá de les nueses fronteres.

Llegaos a estes feches, ye'l momentu de faer balance sobre'l desenvolvimientu de la nuesa micronación mientres anguaño 2010, que güei toca al so fin.

Como yá dixi nel pasáu mes d'ochobre, con motivu del 1º aniversariu de la nuesa independencia, consiguimos ente toos, daqué que de primeres se nos antoxaba una trabayosa xera, pero que sicasí, entamemos con ilusión y firmeza.

L'afitamientu del Reinu d'Asturies, y la so progresión micronacional ye anguaño un fechu, gracies a el constante llabor d'un ampliu y voluntariu equipu d'homes y muyeres, que dende'l principiu creyeron y apostaron por esti proyectu.

Llueñe quedaron yá esos difíciles empiezos y la nuesa nación ye yá exemplu de tolerancia democrática, solidaridá y seriedá.

Mientres anguaño, esti gran equipu trabayó duramente y gracies a ello, güei el Reinu d'Asturies cunta con una amplia y variada ufierta de recursos al algame de toos aquellos que quieren averase y conocer el nuesu proyectu.

22 blogues informativos, 1 cuenta de corréu gmail, otra cuenta en Facebook, a la que y en tan solo 2 meses, xuniéronse más de 60 amigos, 20 trataos de reconocencia y vixentes na actualidá, roblaos con otres tantes micronaciones, miembru de la Organización de Micronaciones Xuníes y de la Microunión Europea, contactos diplomáticos col Principáu de Seborga, un Muséu Virtual Micronacional, una Federación Nacional de Fútbol con dos competiciones en cursu anguaño, una axencia de noticies, dos Premios Lluceru de la OMU y un llargu etcétera, son datos que respuenden por la nuesa trayectoria.

Ye motivu d'arguyu, como Asturorum Rex, liderar esti proyectu y anunciar qu'esto ye solo'l principiu.

El 2011 va ser testigu de nueves iniciatives que van contribuyir a la crecedera d'Asturies como una gran nación.
Establecer relaciones cola totalidá de les micronaciones de la OMU, afondar nos contactos con micronaciones consolidaes qu'han de sirvir d'exemplu, como Hutt River o Seborga, ente otres, collaborar nel desenvolvimientu micronacional suramericanu, participando nos distintos foros yá esistentes, una mayor implicación nel macronacionalismo, establecer alcuerdos de cooperación colos nuesos hermanos de Asturies Occidental, van ser los oxetivos de cara al 2011.

Y pa ello tenémonos que dotar de les ferramientes precises p'afondar nos principios básicos que sofiten al nuesu país, la solidaridá, la democracia, o'l derechu d'autodeterminación., tantu no micro como no macronacional.

Pero tamién tenemos un compromisu social y económico. Llevamos yá dos años de crisis económica dende un puntu de vista macronacional, y dende la nuesa responsabilidá debemos de lluchar contra'l gran azote del desempléu y el deterioru del estáu de bienestar. Va ser una xera ingente, pero como Xefe d'Estáu, toi convencíu de que col esfuerzu de toos vamos saber encarar les torgues que se nos presenten y dar exemplu de superación ante les adversidaes. Por eso faígovos un llamamientu a la concienciación y a una mayor implicación y compromisu dende lo macronacional, para apurriendo cada unu'l so granu de sable, podamos llegar a bon puertu nestes difíciles agües nes que nos tocó salear.

L'espíritu del mio antecesor el Rei Petrus I, sigue vivu n'Asturies, y por eso vamos siguir apostando por establecer marcos de relación ente los distintos ámbitos micronacionales tantu hispanos como de fala inglesa. Siguimos suañando con un micronacionalismo mundial xuníu na paz, l'harmonía, y la convivencia. Nun ye un suañu, ye un oxetivu, y Asturies nun va remacariar nengún esfuerzu a la de contribuyir na so consecución.

Pa terminar, quiero deseyar a tolos asturianos polo xeneral, a los del oriente y a los d'occidente, un prósperu 2011 y en nome de la familia real, y espresar los mios meyores sentimientos a tolos homes y muyeres de la nuesa tierra.

Feliz nueche.

No hay comentarios:

Publicar un comentario